Пролетта полека ни доаѓа на вратата. Право време е и вие да се разбудите од зимскиот сон и да започнете со поактивен живот.
За почеток забавете го работното темпо и повеќе време поминувајте на отворено, а доколку е можно, одете некаде во природа.
Цела зима изведувавте исти движења, кои во главно се сведуваат на седење на маса и гледање во монитор. Тоа ви ги олабави мускулите и затоа потребни ви се вежби за истегнување. Освен тоа, почнете и со брзо одење, возење на велосипед или трчање ако сте во подобра форма.
Најдобро е комбинација од повеќе активности, со што би постигнале подобри резултати.
Со вежбање никогаш не смеете да почнете нагло. Иако вие мислите дека имате доволно кондиција, доколку не се подготвувате постепено, лесно може да ви се случи воспаление на мускулите, поради кое долго време нема да имате желба за никакво вежбање. Пред секое вежбање добро загрејте ги мускулите. Со правилно загревање, мускулите се продготвуваат за поголем физички напор, а со тоа ја намалувате можноста за воспаление. После секое вежбање истегнете се, за да ги опуштите мускулите. Немојте да заборавате да пиете многу вода во текот на вежбањето. Во текот или после вежбањето потребно е да ја надокнадиме течноста која сме ја изгубиле со вежбањето.
Човекот дневно треба да пие најмалку 2 литри течност во денот. Тоа не мора да  биде вода, таа може да се замени и со друг напиток како не пример чај. Но чистата вода никако не смеете потполно да ја исфрлите. Водата ќе ве освежи, прочисти и ќе ви ги подобри работните способности. Дехидрираниот човек ја губи концентрацијата.
Важно е константно да вежбате. Најдобри резултати ќе постигнете со редовно вежбање. Некои истражувања покажале дека секогаш поиздржливи и поуспешни се оние кои се одлучиле да вежбаат секој ден по десет до петнаесет минути, отколку оние кои вежбаат по половина час или подолго. Полесно ќе пронајдете десет минути во распоредот и ќе се одлучите да вежбате, отколку  45 минути. На тој начин ретко ќе го прескокнувате вежбањето.
Немојте да бидете строги и самокритични, ако сега започнете имате доволно време полека да се вратите во форма пред летото.